ന്യൂഡല്ഹി:രണ്ട് ദിവസത്തിനകം മുഖ്യമന്ത്രി സ്ഥാനം രാജിവെക്കുമെന്ന് പ്രഖ്യാപിച്ചിരിക്കുകയാണ് ഡല്ഹി മുഖ്യമന്ത്രി അരവിന്ദ് കെജ്രിവാള്. മദ്യനയ അഴിമതിക്കേസില് ജാമ്യം ലഭിച്ച് ജയില് മോചിതനായതിന് പിന്നാലെ പാര്ട്ടി ഓഫീസില് പ്രവര്ത്തകരെ അഭിസംബോധന ചെയ്യവേയാണ് അപ്രതീക്ഷിത പ്രഖ്യാപനം . കോടതി വിധിയെത്തുടര്ന്നാണ് താന് ജയില് മോചിതനായതെന്നും ഇനി ജനവിധി അറിഞ്ഞിട്ടേ ഈ കസേരയിലിരിക്കൂ എന്നുമാണ് അദ്ദേഹം പ്രഖ്യപിച്ചിരിക്കുന്നത്.
അടുത്ത വര്ഷം ഫെബ്രുവരിയിലാണ് ഡല്ഹിയില് നിയമസഭാ തിരഞ്ഞെടുപ്പ് നടക്കാനിരിക്കുന്നത്. നവംബറില് നടക്കുന്ന മഹാരാഷ്ട്ര തിരഞ്ഞെടുപ്പിനൊപ്പം ഡല്ഹിയേയും പരിഗണിക്കണമെന്നാണ് തിരഞ്ഞെടുപ്പ് കമ്മിഷനോട് എഎപി ആവശ്യപ്പെടുന്നത്. രണ്ട് ദിവസത്തിനകം കെജ്രിവാള് രാജിവെച്ചാല് നവംബര് വരെയോ അടുത്ത തിരഞ്ഞെടുപ്പ് പ്രഖ്യാപിക്കുംവരെയോ പുതിയ മുഖ്യമന്ത്രിയെ എഎപിക്ക് കണ്ടെത്തേണ്ടി വരും.അതാരാകുമെന്നതാണ് ആകാംക്ഷ.
കെജ്രിവാള് കഴിഞ്ഞാല് നിലവില് പാര്ട്ടിയില് രണ്ടാമന് മുന് ഉപമുഖ്യമന്ത്രി മനീഷ് സിസോദിയ ആണ്. എന്നാല് ജനകീയ വിധി വന്ന ശേഷമേ താനും സ്ഥാനം ഏറ്റെടുക്കൂവെന്ന് മനീഷ് സോസിദിയയും വ്യക്തമാക്കിയിട്ടുണ്ട്. കെജ്രിവാള് തന്നെ ഇക്കാര്യം അറിയിക്കുകയും ചെയ്തു.
ഇവര്ക്ക് ശേഷം പിന്നീട് കൂടുതല് സാധ്യത കല്പ്പിക്കുന്നത് നിലവില് മന്ത്രിയായിട്ടുള്ള അതിഷിയാണ്. കെജ്രിവാളടക്കമുള്ള എഎപിയുടെ പ്രധാനപ്പെട്ട നേതാക്കളെല്ലാം ജയിലിലായിരുന്ന ഘട്ടത്തില് അതിഷിയായിരുന്നു പാര്ട്ടിയുടെ മുഖമായി പ്രവര്ത്തിച്ചത്. അതുകൊണ്ട് തന്നെ അവര്ക്കാണ് കൂടുതല് സാധ്യത കല്പ്പിക്കുന്നത്.
