ഗ്യാനേഷ്‌ കുമാറിന്റെ രാജി ആവശ്യപ്പെട്ട്‌ ഡൽഹിയിൽ നടന്ന ‘പീപ്പിൾസ്‌ മാർച്ച്’ പ്രതിഷേധ കടലായി മാറി
Web Desk
ന്യൂഡൽഹി: മുഖ്യ തെരഞ്ഞെടുപ്പ്‌ കമീഷണർ ഗ്യാനേഷ്‌ കുമാറിന്റെ രാജി ആവശ്യപ്പെട്ട്‌ ഡൽഹിയിൽ നടന്ന ‘പീപ്പിൾസ്‌ മാർച്ച്’ പ്രതിഷേധ കടലായി മാറി.പീപ്പിള്‍ എഗെയ്‌ൻസ്റ്റ്‌ എസ്‌ഐആർ കൂട്ടായ്മയുടെ ആഭിമുഖ്യത്തിൽ ഡൽഹിയിൽ തെരഞ്ഞെടുപ്പ്‌ കമീഷൻ ആസ്ഥാനമായ നിർവാചൻ സദൻ ഓഫീസിലേക്ക് നടത്തിയ മാർച്ച് പൊലീസ് ബാരിക്കേഡ് വെച്ച് തടഞ്ഞു. തുടർന്ന് ഇടതുപക്ഷ നേതാക്കൾ ഉൾപ്പെടെയുള്ള പ്രവർത്തകരെ കസ്റ്റഡിയിലെടുത്ത് മാറ്റി.
‘ജനാധിപത്യം വീണ്ടെടുക്കാൻ ജനകീയ പ്രതിഷേധം’ എന്ന മുദ്രാവാക്യമുയർത്തി നടത്തിയ സമരത്തെയും മുമ്പ് ഡൽഹിയിൽ നടത്തിയ സമാധാന സമരങ്ങളെ നേരിട്ട രീതിയിൽ തന്നെയാണ് പൊലീസ് നേരിട്ടത്. വിദ്യാർഥിനികളെ ഉൾപ്പെടെ റോഡിലൂടെ വലിച്ചിഴച്ചാണ് പൊലീസ് വാഹനത്തിൽ കയറ്റിയത്. പ്രകടനത്തെ നേരിടാൻ വലിയ പൊലീസ്, അർധസൈനിക വിന്യാസത്തെയാണ് കേന്ദ്രസർക്കാർ ഒരുക്കിയിരുന്നു.
ഇരുന്നൂറിലേറെ രാഷ്‌ട്രീയ–സാമൂഹ്യ–പ‍ൗരാവകാശ സംഘടനകളുടെ കൂട്ടായ്‌മയാണ്‌ ‘പീപ്പിൾ എഗെൻസ്റ്റ്‌ എസ്‌ഐആർ‘. ഇടതുപക്ഷ പാർടികളും സംഘടനകളും കൂട്ടായ്‌മയിൽ സജീവമാണ്. സമരത്തിൽ സംയുക്ത കിസാൻ മോർച്ച നേതൃത്വത്തിൽ കർഷകരും എഐടിയുസി, എൻഎഫ്ഐഡബ്ള്യു, എഐവൈഎഫ്,എഐഎസ്എഫ്, സിഐടിയു,ഡിവൈഎഫ്ഐ, എസ്‌എഫ്‌ഐ,ഐസ,കെവൈഎസ് സിജെപി ഉൾപ്പെടെ സംഘടനകളും സാമൂഹ്യ പ്രവർത്തകരും പങ്കെടുത്തു.
സി.പി.ഐ ദേശീയ സെക്രട്ടറി പി. സന്തോഷ് കുമാർ എം.പി., ദേശീയ സെക്രട്ടറി ആനി രാജ, സി.പി.ഐ ഡൽഹി സെക്രട്ടറിയും ദേശീയ എക്സിക്യൂട്ടീവ് അംഗവുമായ പ്രൊഫ. ദിനേഷ് വർഷ്നേ, എ.ഐ.വൈ.എഫ് (AIYF) പ്രസിഡന്റ് റോഷൻ കുമാർ സിൻഹ, ജനറൽ സെക്രട്ടറി സുഖ്ജിന്ദർ മഹേസാരി, എ.ഐ.എസ്.എഫ് (AISF) പ്രസിഡന്റ് വിരാജ് ദേവാംഗ് എന്നിവർക്കൊപ്പം സി.പി.ഐ, എ.ഐ.വൈ.എഫ്, എ.ഐ.എസ്.എഫ് പ്രവർത്തകരും, സിവിൽ സമൂഹത്തിലെ പ്രതിനിധികളും, ട്രേഡ് യൂണിയൻ, കർഷക സംഘടനാംഗങ്ങളും ഉൾപ്പെടെ ആയിര കണക്കിന് ആളുകൾ പ്രതിഷേധത്തിൽ പങ്കെടുത്തു.
