താരങ്ങളെയല്ല, അണിയറ പ്രവർത്തകരെ മുൻനിർത്തി ആഘോഷം; ചർച്ചയായി 'ബെത്ലഹേം കുടുംബ യൂണിറ്റിന്റെ' 300 കോടി പോസ്റ്റർ
Web Desk
നിവിൻ പോളി നായകനായെത്തിയ പുതിയ ചിത്രം തിയേറ്ററുകളിൽ വൻ ജനപ്രീതി നേടിക്കൊണ്ട് പ്രദർശനം തുടരുകയാണ്. നിരൂപക പ്രശംസയ്ക്കൊപ്പം പ്രേക്ഷകരെ വീണ്ടും വീണ്ടും തിയേറ്ററുകളിലേക്ക് ആകർഷിക്കുന്ന ഈ ചിത്രം ബുക്ക് മൈ ഷോയിൽ ഏറ്റവും കൂടുതൽ ബുക്ക് ചെയ്യപ്പെട്ട മലയാള സിനിമയെന്ന അപൂർവ്വ നേട്ടവും സ്വന്തമാക്കിയിട്ടുണ്ട്.
ഇപ്പോൾ, ബോക്സ് ഓഫീസിലെ ഈ ചരിത്രവിജയത്തെയും 300 കോടി നേട്ടത്തെയും വേറിട്ട രീതിയിൽ ആഘോഷിക്കുകയാണ് സിനിമയുടെ അണിയറ പ്രവർത്തകർ. സംവിധായകൻ ഗിരീഷ് എ.ഡി, നിർമ്മാതാക്കളായ ഫഹദ് ഫാസിൽ, ദിലീഷ് പോത്തൻ, ശ്യാം പുഷ്കരൻ, ക്യാമറാമാൻ അജ്മൽ സാബു, തിരക്കഥാകൃത്ത് കിരൺ ജോസി, എഡിറ്റർ ആകാശ് ജോസഫ് വർഗ്ഗീസ് എന്നിവരുൾപ്പെടുന്ന സാങ്കേതിക വിദഗ്ദ്ധർക്ക് അർഹിച്ച പ്രാധാന്യം നൽകിക്കൊണ്ട് പുറത്തിറക്കിയ 300 കോടിയുടെ വിജയാഘോഷ പോസ്റ്റർ സോഷ്യൽ മീഡിയയിലും സിനിമാലോകത്തും വലിയ രീതിയിൽ ചർച്ചയായിരിക്കുകയാണ്.
അതേസമയം, 28-ാം ദിനത്തിലും സംസ്ഥാനത്തുടനീളം 266 കേന്ദ്രങ്ങളിലാണ് ചിത്രം നിറഞ്ഞ സദസ്സിൽ പ്രദർശനവുമായി മുന്നേറുന്നത്. മുമ്പ് സൂപ്പർ ഹിറ്റായ ചിത്രങ്ങള്ക്കൊക്കെ നാലാം വാരം ആകുമ്പോഴേക്കും തിയേറ്ററുകകൾ കുറയാറാണ് പതിവ്. 130, 150 തിയേറ്ററുകളാണ് ഒട്ടുമിക്ക സിനിമകള്ക്കും പൊതുവെ ലഭിക്കാറുള്ളത്. എന്നാൽ 'ബെത്ലഹേം കുടുംബ യൂണിറ്റ്' കാണാൻ അഞ്ചാം വാരത്തിലും പ്രേക്ഷകരുടെ തിരക്കാണ് എവിടേയും.
