ചാത്തൻ മാസ്റ്ററുടെ പേര് ദുരുപയോഗം ചെയ്യരുത്: ബിനോയ് വിശ്വം
Web Desk
0
ചാതുർവർണ്യത്തിന്റെ്റെ രാഷ്ട്രീയ കാര്യസ്ഥന്മാരായ ബി ജെ പി ക്ക് സ: പി കെ ചാത്തൻമാസ്റ്ററുടെ പേര് ഉച്ചരിക്കാൻ പോലും അവകാശമില്ലെന്ന് സി പി ഐ സംസ്ഥാന സെക്രട്ടറി ബിനോയ് വിശ്വം പ്രസ്താവിച്ചു.
ദളിതരും ആദിവാസികളും അടക്കമുള്ള മർദ്ദിത ജനവിഭാഗത്തിന്റെ മോചനത്തി നായി ചെങ്കൊടിയേന്തി പടവെട്ടിയ വഴികാട്ടിയാണ് സ: ചാത്തൻമാസ്റ്റർ. 1957 ലെ കമ്മ്യൂണിസ്റ്റ് ഗവൺമെൻ്റിൽ മന്ത്രിയായപ്പോഴും അതിന് മുമ്പും ശേഷവും മർദ്ദിത വർഗ്ഗത്തിൻറെ വിമോചനക്കൊടി ചെങ്കൊടിയാണെന്ന് സ: ചാത്തൻമാസ്റ്റർ ജനങ്ങളെ പഠിപ്പിച്ചു.
പശുവിൻ്റെ പേര് പറഞ്ഞ് രാജ്യത്തെമ്പാടും ദളിത്-ന്യൂനപക്ഷ വേട്ട നടത്തുന്ന പാർട്ടിയാണ് ബി ജെ പി. ദളിതരുടെ കുരകൾ അഗ്നിക്കിരയാക്കുന്നതും സ്ത്രീകളെ മാനഭംഗം ചെയ്യുന്നതും ആർ എസ് എസ്സും ബി ജെ പി യുമാണ്. ഇപ്പോൾ പാവങ്ങളുടെ വോട്ടവകാശം തട്ടിപ്പറിക്കുന്നതും അക്കൂട്ടർ തന്നെ.
ഏഴു കടലിൽ കുളിച്ചാലും ഈ പാപക്കറ ബി ജെ പി യുടെ കയ്യിൽ നിന്നും മാഞ്ഞുപോകില്ല. അത് അറിഞ്ഞുകൊണ്ടാണ് അവർ ചാത്തൻമാസ്റ്ററുടെ പേര് വഞ്ചനാപരമായി ദുരുപയോഗം ചെയ്യുന്നത്. ഈ ദുഷ്‌ട ലക്ഷ്യത്തിൽ വിജയം കാണാമെന്ന് ബി ജെ പി വ്യാമോഹിക്കേണ്ടതില്ലെന്ന് ബിനോയ് വിശ്വം പറഞ്ഞു.
