ബ്രസീൽ ചെങ്കോട്ടയായി തുടരും; ലുല ഡ സിൽവക്ക് മിന്നും വിജയം

ബ്രസീലിയ: ബ്രസീലിലെ പ്രസിഡൻ്റ് തിരഞ്ഞെടുപ്പിൽ തൊഴിലാളി പാർട്ടി നേതാവ് ലൂയിസ് ഇനാഷ്യോ ലുല ഡ സിൽവയ്ക്ക് വീണ്ടും ജയം. ഒക്ടോബർ 25ന് നടന്ന വാശിയേറിയ രണ്ടാം ഘട്ട തിരഞ്ഞെടുപ്പിൽ വലതുപക്ഷ സെനറ്ററും മുൻ പ്രസിഡൻ്റ് ജയർ ബൊൾസൊരാനോയുടെ മകനുമായ ഫ്ലാവിയോ ബൊൾസൊരാനോയെ പരാജയപ്പെടുത്തിയാണ് ലുല അധികാരമുറപ്പിച്ചത്. ലുലയ്ക്ക് 51.7 ശതമാനവും ഫ്ലാവിയോ ബോൾസൊനാരോയ്ക്ക് 48.2 ശതമാനവും വോട്ട് ലഭിച്ചു. 80 വയസ്സുകാരനായ ലുല നാലാം തവണയാണ് ബ്രസീലിന്റെ പ്രസിഡന്റാകുന്നത്.

ഇതിനിടെ തിരഞ്ഞെടുപ്പ് ഫലം പുറത്തുവന്നതിന് പിന്നാലെ പരാജയം അംഗീകരിക്കാൻ വിസമ്മതിച്ചിരിക്കുകയാണ് എതിർ സ്ഥാനാർത്ഥിയായ ഫ്ലാവിയോ ബോൾസൊനാരോ. ഫലം ദ്ദാക്കണമെന്നാണ് ഫ്ലാവിയോ ബോൾസനാരോയുടെ ആവശ്യം. 'വോട്ടെടുപ്പ് സമയം നീട്ടിനൽകിയ തീരുമാനം അംഗീകരിക്കാനാവാത്തതാണെന്ന്' ചൂണ്ടിക്കാട്ടിയാണ് ഫ്ലാവിയോ ഈ തിരഞ്ഞെടുപ്പ് ഫലത്തെ ചോദ്യം ചെയ്യുന്നത്.

എൺപതുകാരനായ ലുലയുടെ വിജയം ലാറ്റിനമേരിക്കയിൽ ശക്തിപ്പെട്ടുവരുന്ന വലതുപക്ഷ രാഷ്ട്രീയത്തിന് തിരിച്ചടിയായാണ് വിലയിരുത്തപ്പെടുന്നത്. യു.എസ്. പ്രസിഡന്റ് ഡൊണാൾഡ് ട്രംപ് പിന്തുണയ്ക്കുന്ന വലതുപക്ഷ രാഷ്ട്രീയ മുന്നേറ്റത്തിനും ഈ ഫലം തിരിച്ചടിയാവും. 2027മുതൽ 2030വരെയാണ് ലുലയുടെ പുതിയ ഭരണകാലം. 1988-ൽ ജനാധിപത്യം പുനഃസ്ഥാപിക്കപ്പെട്ടതിനുശേഷം ആദ്യഘട്ടത്തിൽ പരാജയപ്പെട്ടിട്ടും രണ്ടാംഘട്ട വോട്ടെടുപ്പിൽ വിജയിക്കുന്ന ആദ്യ സ്ഥാനാർഥിയാണ് ലുല.

ബ്രസീൽ പ്രസിഡന്റ് തിരഞ്ഞെടുപ്പിൽ വിജയിച്ച ശേഷം ലൂയിസ് ഇനാസിയോ ലുല ഡ സിൽവ പറഞ്ഞു: "ബ്രസീലിലെ ജനാധിപത്യം സംരക്ഷിക്കുന്നതിന് വോട്ട് ചെയ്യുന്നത് അത്യന്താപേക്ഷിതമാണെന്ന് ജനങ്ങളെ ബോധ്യപ്പെടുത്താൻ ഞങ്ങൾക്ക് സാധിച്ചു. ഡിജിറ്റൽ പ്ലാറ്റ്‌ഫോമുകൾ വഴിയുള്ള വിദേശ ഇടപെടലുകളെ ഞങ്ങൾ പരാജയപ്പെടുത്തി. ബ്രസീൽ ആരുടെയും പിന്നാമ്പുറമല്ല. രാജ്യം ഭരിക്കുന്ന രീതിയിൽ ഞങ്ങൾ മാറ്റം വരുത്തും; തീരുമാനങ്ങൾ എടുക്കുന്ന പ്രക്രിയയിൽ ജനങ്ങളുടെ പങ്കാളിത്തം ഞങ്ങൾ വർദ്ധിപ്പിക്കും."

2003 ജനുവരിമുതൽ 2010 ഡിസംബർവരെ തുടർച്ചയായി രണ്ടുതവണ ബ്രസീൽ പ്രസിഡന്റായിരുന്ന ലുല, 2023 ജനുവരിയിലാണ് വീണ്ടും അധികാരത്തിലെത്തിയത്. 2017-ൽ അഴിമതിക്കേസിൽ ശിക്ഷിക്കപ്പെട്ട് 18 മാസത്തിലധികം ജയിലിൽ കഴിഞ്ഞിരുന്നു. എന്നാൽ, 2021-ൽ ആ ശിക്ഷകൾ റദ്ദാക്കപ്പെട്ടതോടെ വീണ്ടും പ്രസിഡന്റ് തിരഞ്ഞെടുപ്പിൽ മത്സരിക്കാൻ വഴിയൊരുങ്ങി. 2022-ലെ തിരഞ്ഞെടുപ്പിൽ മുൻ പ്രസിഡന്റ് ജെയർ ബോൾസൊനാരോയെ പരാജയപ്പെടുത്തി അധികാരത്തിലെത്തിയ ലുല ഇപ്പോൾ അദ്ദേഹത്തിന്റെ മകനായ ഫ്‌ളാവിയോ ബോൾസൊനാരോയെയും തോൽപ്പിച്ചിരിക്കുകയാണ്.