അർജന്റീന — സ്പെയിൻ ലോകകപ്പ് ഫൈനൽ; 2021ലെ പ്രവചനം സത്യമാകുമോ?
Web Desk
2026 ഫിഫ ലോകകപ്പ് ഫൈനലിൽ അർജന്റീനയും സ്പെയിനും തമ്മിൽ മാറ്റുരയ്ക്കാനിരിക്കെ, അഞ്ച് വർഷം മുൻപ് സോഷ്യൽ മീഡിയയിൽ പ്രത്യക്ഷപ്പെട്ട ഒരു പ്രവചനം വലിയ ചർച്ചയ്ക്ക് വഴി വച്ചിരിക്കുകയാണ്. 2021 ജൂലൈയിൽ ‘@actuallyimthe’ എന്ന എക്സ് അക്കൗണ്ടിൽ വന്ന “2026 ലോകകപ്പ് ഫൈനലിൽ അർജന്റീന സ്പെയിനിനെ 3–2 ന് തോൽപ്പിച്ചു” എന്ന ലളിതമായ പോസ്റ്റാണ് ഇപ്പോൾ ഇന്റർനെറ്റിലെ ചര്ച്ചാ വിഷയം.
ബുധനാഴ്ച നടന്ന ആവേശകരമായ സെമിഫൈനലിൽ ഇംഗ്ലണ്ടിനെ ഒന്നിനെതിരെ രണ്ട് ഗോളുകൾക്ക് തകർത്ത് അർജന്റീന ഫൈനലിൽ പ്രവേശിച്ചതോടെ ഈ പ്രവചനം സത്യമാകുന്നതിലേക്ക് ഒരുപടി കൂടി അടുത്തിരിക്കുകയാണ്. നായകൻ ലയണൽ മെസിയുടെ രണ്ട് അസിസ്റ്റുകളിൽ എൻസോ ഫെർണാണ്ടസ്, ലൗട്ടാരോ മാർട്ടിനസ് എന്നിവർ നേടിയ ഗോളുകളിലാണ് നിലവിലെ ചാമ്പ്യന്മാരായ അർജന്റീന ഫൈനൽ ടിക്കറ്റെടുത്തത്. ഫ്രാൻസിനെ എതിരില്ലാത്ത രണ്ട് ഗോളുകൾക്ക് തോൽപ്പിച്ചാണ് സ്പെയിൻ നേരത്തെ ഫൈനൽ ഉറപ്പിച്ചത്.
കമ്പ്യൂട്ടർ ഗെയിമിംഗ് ഉള്ളടക്കങ്ങൾ പങ്കുവെക്കാറുള്ള ഈ അക്കൗണ്ടിൽ നിന്ന് അഞ്ച് വർഷം മുൻപ് വന്ന ഈ പോസ്റ്റിന് ഇപ്പോൾ ഒന്നര ലക്ഷത്തിലധികം ലൈക്കുകളാണ് ലഭിച്ചിരിക്കുന്നത്. അർജന്റീന ഫൈനലിലെത്തിയതിന് പിന്നാലെ ഈ അക്കൗണ്ട് ഉടമ ഒരു ‘വാച്ച്’ ഇമോജി പങ്കുവെച്ചുകൊണ്ട് സ്വന്തം ട്വീറ്റിന് മറുപടി നൽകുകയും ചെയ്തു. 2019ൽ ‘ഐസയ’ എന്ന മറ്റൊരു അക്കൗണ്ടിൽ നിന്ന് വന്ന 39കാരനായ മെസി 2026ൽ തന്റെ രണ്ടാമത്തെ ലോകകപ്പ് ഉയർത്തും എന്ന പ്രവചനവും ഇതോടൊപ്പം വൈറലായിട്ടുണ്ട്. നിലവിൽ മെസിക്ക് 39 വയസ്സാണ് പ്രായം. ന്യൂജേഴ്സിയിലെ മെറ്റ്ലൈഫ് സ്റ്റേഡിയത്തിൽ ഞായറാഴ്ച നടക്കുന്ന കലാശപ്പോരാട്ടത്തിൽ, 39കാരനായ മെസിയും സ്പെയിനിൻ്റെ കൗമാ ലാമിൻ യമാലും നേർക്കുനേർ വരുന്നു എന്ന പ്രത്യേകതയുമുണ്ട്. ഈ പ്രവചനം പൂർണ്ണമായും സത്യമാകുമോ എന്നറിയാനുള്ള കാത്തിരിപ്പിലാണ് ഇപ്പോൾ ഫുട്ബോൾ ലോകം.
