സൗരവ് ദാസിന്റെയും അശുതോഷ് റാങ്കയുടെയും കസ്റ്റഡി: ഹൈക്കോടതിയെ സമീപിച്ച് സി.ജെ.പി

ഡൽഹി: സൗരവ് ദാസിന്റെയും അശുതോഷ് റാങ്കയുടെയും കരുതൽ തടങ്കൽ കാലാവധി നീട്ടിയ സ്പെഷ്യൽ എക്സിക്യൂട്ടീവ് മജിസ്ട്രേറ്റ് ഉത്തരവിനെതിരെ ഡൽഹി ഹൈക്കോടതിയെ സമീപിച്ച് സി.ജെ.പി. ഭരണഘടനയുടെ അനുച്ഛേദം 21 ഉറപ്പുനൽകുന്ന വ്യക്തിസ്വാതന്ത്ര്യത്തിനുള്ള മൗലികാവകാശത്തിന്റെ ലംഘനമാണ് നടക്കുന്നതെന്ന് ചൂണ്ടിക്കാട്ടി, രാത്രിയിലടക്കം അടിയന്തരമായി വാദം കേൾക്കണമെന്നും ഹർജിയിൽ ആവശ്യപ്പെട്ടു. എന്നാൽ ഹർജി ഇന്ന് പരിഗണിക്കില്ല.

പ്രതിഷേധങ്ങൾക്കിടെ സുരക്ഷാ മാനദണ്ഡങ്ങൾ ലംഘിച്ച് ജന്തർ മന്തറിൽ പ്രവേശിച്ചെന്നാരോപിച്ച് ഒക്ടോബർ 14 നാണ് റാങ്കയെയും ദാസിനെയും പൊലീസ് അറസ്റ്റ് ചെയ്തത്. തിങ്കളാഴ്ച ഇവരുടെ കസ്റ്റഡി കാലാവധി സ്പെഷ്യൽ എക്സിക്യൂട്ടീവ് മജിസ്ട്രേറ്റ് രണ്ട് ദിവസത്തേക്ക് കൂടി നീട്ടിയിരുന്നു. ഇതോടെ ഇരുവരുടെയും ആകെ കസ്റ്റഡി ഏഴ് ദിവസമായി ഉയർന്നു.

ഡൽഹി പൊലീസിലെ എ.സി.പി റാങ്കിലുള്ള ഉദ്യോഗസ്ഥനായ എസ്.ഇ.എം ഋതു രാജ് ഒപ്പുവെച്ച ഉത്തരവിൽ, ഇരുവരുടെയും പെരുമാറ്റം വിശ്വാസ്യത ഉണർത്തുന്നില്ലെന്നും നിയമത്തോട് യാതൊരു ബഹുമാനവുമില്ലെന്നും ചൂണ്ടിക്കാട്ടുന്നു. പ്രതിഷേധങ്ങൾ നിരോധിച്ച സ്ഥലത്ത് ഇവർ നിരന്തരം സമരങ്ങൾക്ക് ആഹ്വാനം ചെയ്യുന്നുവെന്നും ഉത്തരവിൽ പറയുന്നു. 

അതേസമയം, കോടതിയിൽ നിന്ന് പുറത്തേക്ക് കൊണ്ടുപോകുന്നതിനിടെ സ്പെഷ്യൽ എക്സിക്യൂട്ടീവ് മജിസ്ട്രേറ്റ്  കോടതിയെ പൊലീസ് കോടതി എന്നാണ് സൗരവ് ദാസ് വിശേഷിപ്പിച്ചത്. ഇവിടെ നീതി ലഭിക്കുന്നില്ലെന്നും അദ്ദേഹം പ്രതികരിച്ചു.

തിഹാർ ജയിലിൽ കഴിയുന്ന സൗരവ് ദാസിന്റെയും അശുതോഷ് റാങ്കയുടെയും തടങ്കലുമായി ബന്ധപ്പെട്ട് എക്സിക്യൂട്ടീവ് അധികാരങ്ങൾ ഏകപക്ഷീയമായി ദുരുപയോഗം ചെയ്യുകയാണെന്നും നടപടിക്രമങ്ങൾ ലംഘിച്ചുവെന്നും ചൂണ്ടിക്കാട്ടിയാണ് സി.ജെ.പി റിട്ട് ഹർജി സമർപ്പിച്ചത്. വിഷയം അടിയന്തരമായി പരിഗണിച്ച് ഇരുവരെയും മോചിപ്പിക്കാൻ നിർദ്ദേശം നൽകണമെന്ന് ഡൽഹി ഹൈക്കോടതി ചീഫ് ജസ്റ്റിസിനോട് ഹർജിയിൽ ആവശ്യപ്പെട്ടിട്ടുണ്ട്.