സിപിഐ ദേശീയ ആസ്ഥാനമായ ‘അജോയ് ഭവനിൽ’ അതിക്രമിച്ച് കയറി ഡൽഹി പോലീസ്

ന്യുഡല്‍ഹി സിപിഐ ദേശീയ ആസ്ഥാനമായ ‘അജോയ് ഭവനിൽ’ ഡൽഹി പോലീസ് അത്ക്രമിച്ച് കയറി. പ്രധാനമന്ത്രി നരേന്ദ്ര മോദി, ആഭ്യന്തര മന്ത്രി അമിത് ഷാ, മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാർ എന്നിവരുടെ കോലങ്ങൾ കത്തിച്ചുകൊണ്ടുള്ള പ്രതിഷേധം തടയാനാണ് പോലീസ് നടപടി.
പോലീസിന്റെ ഈ ഇടപെടലിനെയും ഭീഷണിപ്പെടുത്തലിനെയും ധാർഷ്ട്യം നിറഞ്ഞ പെരുമാറ്റത്തെയും സിപിഐ ശക്തമായി അപലപിച്ചു. ഇന്ത്യയെപ്പോലൊരു ജനാധിപത്യ രാജ്യത്ത്, ജനാധിപത്യപരമായ പ്രതിഷേധങ്ങൾക്കും രാഷ്ട്രീയ പ്രവർത്തനങ്ങൾക്കും നേരെ ഇത്തരത്തിലുള്ള നടപടികൾ സ്വീകരിക്കുന്നത് ഒട്ടും അംഗീകരിക്കാനാവില്ലയെന്ന് പാര്‍ട്ടി പ്രസ്താവനയില്‍ പറഞ്ഞു.

സമാധാനപരമായ പ്രതിഷേധത്തിനുള്ള അവകാശവും അഭിപ്രായ സ്വാതന്ത്ര്യവും നമ്മുടെ ജനാധിപത്യത്തിന്റെ അടിസ്ഥാന ഘടകങ്ങളാണ്. രാഷ്ട്രീയ പ്രവർത്തകരെ ഭീഷണിപ്പെടുത്തുകയോ സമാധാനപരമായ രാഷ്ട്രീയ പ്രവർത്തനങ്ങളെ തടസ്സപ്പെടുത്തുകയോ ചെയ്യുന്നതിന് പകരം, ജനാധിപത്യ അവകാശങ്ങളെ മാനിക്കാൻ പോലീസ് തയ്യാറാകണമെന്നും പ്രസ്താവനയിൽ പറഞ്ഞു.