രാജ്യത്തെ 'ഭരണമാറ്റ' വിവാദം - കിരൺ റിജിജുവിനെ തള്ളി ശശി തരൂർ, ലക്ഷ്യം സർക്കാരിനെ അട്ടിമറിക്കലല്ല

ന്യുഡൽഹി: എസ്ഐആറിനെ ചൊല്ലി നടക്കുന്ന പ്രതിഷേധങ്ങളെ ബംഗ്ലാദേശിലെയും ഫ്രാൻസിലെയും പ്രക്ഷോഭങ്ങളുമായി കേന്ദ്രമന്ത്രി കിരൺ റിജിജു താരതമ്യം ചെയ്തതിനെ തള്ളി കോൺഗ്രസ് എംപി ശശി തരൂർ. പ്രതിപക്ഷം ആവശ്യപ്പെടുന്നത് സ്വതന്ത്രവും നിഷ്പക്ഷവുമായ തിരഞ്ഞെടുപ്പാണെന്നും അല്ലാതെ സർക്കാരിനെ താഴെയിറക്കാനല്ലെന്നും അദ്ദേഹം വ്യക്തമാക്കി.

ഇന്ത്യ ബംഗ്ലാദേശോ ഫ്രാൻസോ അല്ലെന്നാണ് താൻ കരുതുന്നതെന്നും ഇത്തരത്തിലുള്ള ഉപമകൾ ഇവിടെ പ്രസക്തമായി തോന്നുന്നില്ലെന്നും വാർത്താ ഏജൻസിയായ എഎൻഐയോട് സംസാരിക്കവെ ശശി തരൂർ പറഞ്ഞു. പ്രതിപക്ഷം സമാധാനപരമായ പ്രതിഷേധങ്ങളെയാണ് പിന്തുണയ്ക്കുന്നതെന്നും ബസുകൾക്കും പൊലീസ് സ്റ്റേഷനുകൾക്കും തീയിടുന്നതുപോലുള്ള അക്രമങ്ങളെ ഒരിക്കലും ന്യായീകരിക്കില്ലെന്നും അദ്ദേഹം വ്യക്തമാക്കി. 

ഇന്ത്യയിലെ യുവാക്കളെ പ്രകോപിപ്പിച്ച് കലാപമുണ്ടാക്കാൻ "ഇന്ത്യൻ വിരുദ്ധ" ഗ്രൂപ്പുകളും ചില രാഷ്ട്രീയക്കാരും ഗൂഢാലോചന നടത്തിയെന്നും ബംഗ്ലാദേശിലും ഫ്രാൻസിലും ഉണ്ടായ അശാന്തിയോട് ഇതിന് സാമ്യമുണ്ടെന്നും കിരൺ റിജിജു കഴിഞ്ഞ ദിവസം ആരോപിച്ചിരുന്നു.  ഇതിനുപിന്നാലെയാണ് തരൂരിന്റെ പ്രതികരണം.

വിഷയം തിരഞ്ഞെടുപ്പ് നടത്തുന്നതിനെയും ഭരണഘടനാ സ്ഥാപനങ്ങളുടെ പ്രവർത്തനത്തെയും കുറിച്ചുള്ളതാകുമ്പോൾ "ഭരണമാറ്റം" എന്ന പ്രയോഗത്തെ വളച്ചൊടിക്കുന്നതിൽ അർത്ഥമില്ലെന്ന് തരൂർ പറഞ്ഞു. സ്വതന്ത്രവും നിഷ്പക്ഷവുമായ തിരഞ്ഞെടുപ്പാണ് ആവശ്യപ്പെടുന്നത്. അക്രമരഹിതവും ഭാഗികമായി നിയമവിരുദ്ധവുമായ നടപടികളിലൂടെ വലിയൊരു വിഭാഗം വോട്ടർമാരെ വോട്ടർ പട്ടികയിൽ നിന്ന് ഒഴിവാക്കിയിട്ടുണ്ടെന്ന് ആരോപിച്ചുകൊണ്ട് അദ്ദേഹം പറഞ്ഞു.

പ്രതിപക്ഷത്തിന്റെ ആശങ്കകൾ ഭരണഘടനാപരമാണെന്നും സർക്കാരിനെ താഴെയിറക്കാനുള്ള ശ്രമമല്ലെന്നും തരൂർ വ്യക്തമാക്കി. തന്റെ വിമർശനം തിരഞ്ഞെടുപ്പ് കമ്മീഷൻ എന്ന സ്ഥാപനത്തിന് എതിരെയല്ല, മറിച്ച് അതിന്റെ പ്രവർത്തന ശൈലിക്കെതിരെ മാത്രമാണെന്നും അദ്ദേഹം കൂട്ടിച്ചേർത്തു.