ജൂഹു വെടിവെപ്പ്: കയ്യിൽ ബാൻഡേജുമായുള്ള ടൈഗർ ഷ്രോഫിന്റെ ആദ്യ ചിത്രങ്ങൾ പുറത്ത്

മുംബൈ: ജുഹുവിൽ നടന്ന വെടിവെപ്പിന് ശേഷം ബോളിവുഡ് നടൻ ടൈഗർ ഷ്രോഫിന്റെ ആദ്യ ചിത്രങ്ങൾ പുറത്തുവന്നു. തോളിലും നെഞ്ചിലും ഡ്രെസിങ്ങും വലതുകൈയിൽ ബാൻഡേജുമായി വീട്ടിലിരിക്കുന്ന അദ്ദേഹത്തെ വൈകിട്ടോടെ ഉപമുഖ്യമന്ത്രി ഏക്‌നാഥ് ഷിൻഡെ സന്ദർശിച്ചു. ആക്രമണത്തിൽ നടന് വെടിയേറ്റ മുറിവുകളൊന്നുമില്ലെന്നാണ് പോലീസ് മുൻപ് അറിയിച്ചിരുന്നത്. എന്നാൽ ചിത്രങ്ങളിൽ കാണുന്ന മുറിവുകളുടെ സ്വഭാവം എന്താണെന്ന് ഇതുവരെ വിശദീകരിച്ചിട്ടില്ല.

ഷ്രോഫിന്റെ വസതിയിൽ കുടുംബത്തെ സന്ദർശിച്ച ശേഷം മാധ്യമങ്ങളോട് സംസാരിച്ച ഷിൻഡെ, സംഭവം ഗൗരവമുള്ളതും അപലപനീയവുമാണെന്ന് പറഞ്ഞു. മുംബൈയിൽ ഗുണ്ടാ സംഘർഷങ്ങൾവീണ്ടും ശക്തമാക്കാനുള്ള ഏതൊരു നീക്കത്തിനെതിരെയും അദ്ദേഹം മുന്നറിയിപ്പ് നൽകി. "മുംബൈ മുൻകാലങ്ങളിൽ കടുത്ത ഗുണ്ടാ പോരാട്ടങ്ങൾക്ക് സാക്ഷ്യം വഹിച്ചിട്ടുള്ളതാണ്. ശക്തമായ നടപടികളിലൂടെയാണ് പോലീസ് അന്ന് ആ സാഹചര്യം നിയന്ത്രണവിധേയമാക്കിയത്. ആ നാളുകൾ വീണ്ടും സൃഷ്ടിക്കാനോ നഗരത്തിലെ സമാധാനം തകർക്കാനോ ആരെയും അനുവദിക്കില്ല," അദ്ദേഹം പറഞ്ഞു.

ടൈഗറുമായും അദ്ദേഹത്തിന്റെ പിതാവും മുതിർന്ന നടനുമായ ജാക്കി ഷ്രോഫുമായും സംസാരിച്ചതായി ഷിൻഡെ അറിയിച്ചു. സർക്കാരും മുംബൈ പോലീസും കുടുംബത്തിനൊപ്പമുണ്ടെന്നും അവരുടെ സുരക്ഷാ ആശങ്കകൾ പരിഹരിക്കുമെന്നും അദ്ദേഹം ഉറപ്പുനൽകി. അഞ്ച് റൗണ്ട് വെടിവെപ്പ് നടന്നതായും ഡ്രൈവർക്ക് പരുക്കേറ്റതായും നടൻ തലനാരിഴയ്ക്കാണ് രക്ഷപ്പെട്ടതെന്നും അദ്ദേഹം പറഞ്ഞു.

ആക്രമണത്തിന് പിന്നിൽ ലോറൻസ് ബിഷ്‌ണോയ് സംഘമാണെന്ന റിപ്പോർട്ടുകളെക്കുറിച്ച് ചോദിച്ചപ്പോൾ, ഏത് ഗുണ്ടാസംഘം ഉൾപ്പെട്ടിട്ടുണ്ടെങ്കിലും ആളുകളെ ഭീഷണിപ്പെടുത്താനോ അക്രമത്തിന്റെ ഉത്തരവാദിത്തം ഏറ്റെടുക്കാനോ ഉള്ള ശ്രമങ്ങൾ വെച്ചുപൊറുപ്പിക്കില്ലെന്ന് ഷിൻഡെ വ്യക്തമാക്കി. ഭീഷണി കോളുകളോ സന്ദേശങ്ങളോ ലഭിച്ചാൽ പ്രമുഖരും സാധാരണക്കാരും ഉടൻ തന്നെ പോലീസിനെ വിവരമറിയിക്കണമെന്ന് അദ്ദേഹം അഭ്യർത്ഥിച്ചു.

"ഒരു പ്രമുഖ വ്യക്തിയോ വ്യവസായിയോ സാധാരണക്കാരനോ ആകട്ടെ, എല്ലാവരുടെയും സുരക്ഷ പ്രധാനമാണ്. മുംബൈയിൽ ഒരു ഗുണ്ടാസംഘത്തെയും സ്വതന്ത്രമായി വിഹരിക്കാൻ അനുവദിക്കില്ല. നിയമം കയ്യിലെടുക്കാൻ ആരെയും സർക്കാർ അനുവദിക്കില്ല," അദ്ദേഹം പറഞ്ഞു.