ഗ്രേറ്റർ നോയിഡയിലെ കൂട്ടമരണത്തിൽ വഴിത്തിരിവ്; മൂന്ന് ബന്ധുക്കൾ കസ്റ്റഡിയിൽ

ഗ്രേറ്റർ നോയിഡയിൽ ദമ്പതികളെയും മൂന്ന് മക്കളെയും വീടിനുള്ളിൽ മരിച്ച നിലയിൽ കണ്ടെത്തിയ സംഭവത്തിൽ ആത്മഹത്യാ പ്രേരണയ്ക്ക് മൂന്ന് കുടുംബാംഗങ്ങൾക്കെതിരെ എഫ്.ഐ.ആർ രജിസ്റ്റർ ചെയ്ത് പൊലീസ്. റബൂപ്പുര പ്രദേശത്തെ ഗ്രാമത്തിൽ ശനിയാഴ്ച രാവിലെയോടെയാണ് അഞ്ചം​ഗ കുടുംബത്തെ മരിച്ച നിലയിൽ കണ്ടെത്തിയത്. 

മഹേഷ് (37), ഭാര്യ ലളിത (35), മക്കളായ ലഡ്ഡു (11), സാക്ഷാത് (3), മകൾ മിഷ്ടി (7) എന്നിവരാണ് മരിച്ചത്. നഗ്ല ശ്രീ പദം ഗ്രാമത്തിലാണ് സംഭവം നടന്നതെന്ന് പൊലീസ് അറിയിച്ചു. ഭക്ഷ്യവിഷബാധയാകാം മരണകാരണമെന്നാണ് നേരത്തെ പൊലീസ് പറഞ്ഞിരുന്നത്.

ഉറങ്ങാൻ കിടക്കുന്നതിന് മുമ്പ് കുടുംബം ചായ കുടിച്ചിരുന്നതായി കുടുംബാംഗങ്ങളിലൊരാൾ പറഞ്ഞു. പിറ്റേന്ന് രാവിലെയാണ് ഇവരെ മരിച്ച നിലയിൽ കണ്ടെത്തിയത്. പോസ്റ്റ്‌മോർട്ടം, ഫോറൻസിക് റിപ്പോർട്ടുകൾക്കായി കാത്തിരിക്കുകയാണ് പൊലീസ്. മരണകാരണം വ്യക്തമാകാൻ ഭക്ഷണ സാമ്പിളുകൾ പരിശോധനയ്ക്കായി ശേഖരിച്ചിട്ടുണ്ടെന്ന് പൊലീസ് പറഞ്ഞു.

ലളിതയുടെ സഹോദരൻ ആകാശ് നൽകിയ പരാതിയുടെ അടിസ്ഥാനത്തിലാണ് മൂന്ന് പ്രതികൾക്കെതിരെ രാത്രി വൈകി കേസ് എടുത്തതെന്നാണ് അന്വേഷണത്തിലെ പുതിയ വിവരങ്ങൾ വ്യക്തമാക്കി പൊലീസ് അറിയിച്ചിരിക്കുന്നത്. മഹേഷിന്റെ അളിയൻ ശേഖർ (50), ശേഖറിന്റെ ഭാര്യയും മഹേഷിന്റെ സഹോദരിയുമായ സുനിത (45), സപ്ന (32) എന്നിവരാണ് പ്രതികൾ. ഡൽഹി സ്വദേശികളായ ഇവരെ മൂവരെയും കസ്റ്റഡിയിലെടുത്തു.

"അന്വേഷണത്തിനിടയിൽ മഹേഷിന്റെ ഫോണിൽ നിന്ന് ഒരു ഓഡിയോ റെക്കോർഡിംഗ് ലഭിച്ചു. മറ്റൊരു ഫോണിൽ നിന്ന് സ്വയം അയച്ച ഈ റെക്കോർഡിംഗിൽ, നടന്ന സംഭവങ്ങൾക്കെല്ലാം ഉത്തരവാദികൾ ഈ മൂന്ന് പേരാണെന്ന് അദ്ദേഹം ആരോപിക്കുന്നു," മുതിർന്ന പൊലീസ് ഉദ്യോഗസ്ഥൻ പറഞ്ഞു.

അയൽക്കാരിൽ നിന്നും ബന്ധുക്കളിൽ നിന്നും ശേഖരിച്ച വിവരങ്ങളുടെ അടിസ്ഥാനത്തിൽ, ഡൽഹിയിലെ ഷാലിമാർ ബാഗ് നിവാസിയായ മഹേഷിന്റെ സഹോദരി സുനിത, മഹേഷും അമ്മയും താമസിച്ചിരുന്ന വീട് സ്വന്തം പേരിലേക്ക് മാറ്റാൻ അമ്മ ചന്ദ്രവതിയെ പ്രേരിപ്പിച്ചതായി പൊലീസ് ഉദ്യോഗസ്ഥൻ അറിയിച്ചു. ഇതറിഞ്ഞ മഹേഷ് കടുത്ത മാനസിക വിഷമത്തിലായിരുന്നുവെന്നും ഉദ്യോഗസ്ഥൻ കൂട്ടിച്ചേർത്തു.

"വീടിന് പുറത്തുള്ള സിസിടിവി ദൃശ്യങ്ങൾ ഞങ്ങൾ പരിശോധിച്ചു, കുടുംബം മേളയിൽ നിന്ന് മടങ്ങിയെത്തിയ ശേഷം രാത്രിയിൽ ആരും വീട്ടിൽ കയറുന്നതോ പുറത്തുപോകുന്നതോ കണ്ടിട്ടില്ല. പോസ്റ്റ്മോർട്ടത്തിൽ അഞ്ച് പേരുടെയും ആന്തരികാവയവങ്ങൾ ഫോറൻസിക് സയൻസ് ലബോറട്ടറിയിലേക്ക് അയക്കും" പൊലീസ് ഉദ്യോ​ഗസ്ഥൻ പറഞ്ഞു.