തെരഞ്ഞെടുപ്പ് കമ്മീഷനെതിരെ ഇന്ത്യ സഖ്യനേതാക്കള്‍ നല്‍കിയ ഹര്‍ജികള്‍ ഇന്ന് സുപ്രീംകോടതിയില്‍
Web Desk
ന്യൂഡല്‍ഹി: തീവ്ര വോട്ടര്‍പട്ടികപരിഷ്‌കരണത്തിലെ ക്രമക്കേടുകളും ഫോം ആറിലെ ഭേദഗതിയും ചോദ്യംചെയ്ത് ഇന്ത്യാ സഖ്യം നേതാക്കള്‍ സമര്‍പ്പിച്ച ഹര്‍ജികള്‍ സുപ്രീംകോടതി ഇന്ന് പരിഗണിക്കും. എസ്‌ഐആര്‍ നടപടികള്‍ അടിയന്തരമായി നിര്‍ത്തിവെക്കണമെന്ന് ഹര്‍ജിയില്‍ ആവശ്യപ്പെടുന്നു. തെരഞ്ഞെടുപ്പ് കമ്മിഷന്‍, മുഖ്യ തെരഞ്ഞെടുപ്പ് കമ്മിഷണര്‍ ഗ്യാനേഷ് കുമാര്‍, തെരഞ്ഞെടുപ്പ് കമ്മിഷണര്‍മാരായ സുഖ്ബീര്‍ സിങ് സന്ധു, വിവേക് ജോഷി എന്നിവരെയാണ് ഹര്‍ജിയില്‍ എതിര്‍കക്ഷികളായി ചേര്‍ത്തിരിക്കുന്നത്.
വോട്ടര്‍ പട്ടികയില്‍ നിന്ന് ഒഴിവാക്കിയതും വരുത്തിയ മാറ്റങ്ങളും ഒരു നിശ്ചിത സമയപരിധിക്കുള്ളില്‍ ഓഡിറ്റ് ചെയ്യുന്നതിനായി ഒരു വിരമിച്ച സുപ്രീം കോടതി ജഡ്ജിയുടെ നേതൃത്വത്തില്‍ സാങ്കേതിക വിദഗ്ധരെയും മറ്റ് പ്രമുഖ പൗരന്മാരെയും ഉള്‍പ്പെടുത്തി ഒരു സ്വതന്ത്ര സമിതിയെ നിയമിക്കണമെന്നും ഹര്‍ജിയില്‍ ആവശ്യപ്പെടുന്നു. പഞ്ചാബിലെയും തെരഞ്ഞെടുപ്പ് നടക്കാനിരിക്കുന്ന മറ്റു സംസ്ഥാനങ്ങളിലെയും വോട്ടര്‍മാര്‍ക്ക് നിശ്ചയിച്ച സമയപരിധിക്കുള്ളില്‍ വോട്ടര്‍പട്ടികയില്‍ ഉള്‍പ്പെടുത്തുന്നതിന് അപേക്ഷിക്കാന്‍ കഴിയുന്നുണ്ടെന്ന് ഉറപ്പാക്കണമെന്നും ആവശ്യപ്പെട്ടിട്ടുണ്ട്.
ഈ വിഷയത്തില്‍ മുമ്പ് സമര്‍പ്പിക്കപ്പെട്ട ഹര്‍ജികളും സുപ്രീംകോടതി ഇന്നു പരിഗണിക്കുന്നുണ്ട്.
ഹര്‍ജിയില്‍ ഒട്ടേറെ ന്യൂനതകള്‍
കോണ്‍ഗ്രസ് നേതാവ് രാഹുല്‍ ഗാന്ധിയും മറ്റു പ്രതിപക്ഷ നേതാക്കളും സംയുക്തമായി കോടതിയില്‍ സമര്‍പ്പിച്ച ഹര്‍ജിയില്‍ 14 ന്യൂനതകളാണ് സുപ്രീംകോടതി രജിസ്ട്രി ചൂണ്ടിക്കാട്ടിയിട്ടുള്ളത്. കോടതി ഫീസായ 220 രൂപയുടെ കുറവ്, ഒമ്പത് ഹര്‍ജിക്കാര്‍ ഒപ്പിടേണ്ട അംഗീകാരപത്രങ്ങളുടെ അഭാവം, കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖര്‍ഗെയുടെ തിരിച്ചറിയല്‍ കാര്‍ഡിന്റെ അവ്യക്തമായ ഫോട്ടോ കോപ്പി തുടങ്ങിയവയാണ് സുപ്രീം കോടതി ചൂണ്ടിക്കാട്ടിയ പിഴവുകള്‍. പിഴവുകള്‍ തിരുത്തി നല്‍കണമെന്ന് സുപ്രീംകോടതി നിര്‍ദേശിച്ചിട്ടുണ്ട്.
